喫茶去蹭茶田子坊

《 蹭茶田子坊 》

                              ------沈一珠

约个朋友田子坊，

碰着卖茶小姑娘；

蹭杯热茶老老香，

下趟特为去一趟。

上半天，太阳还勿是老烊，田子坊里大部分小商店侪冷笃笃，营业员像煞还呒末困醒，侬看伊一眼，伊也看侬一眼；侬勿去睬伊，伊勿来睬侬。

田子坊名气也响了，有点架子也正常，勿好拍照，勿好回价，对于就想去随便荡荡白相相的人来讲，乐趣少脱交关。

不过，也公平，侬当老喫老做的营业员看勿出来，啥人是来瞎兜八兜，啥人是来用铜钿的？

所以，勒弄堂口碰着迭呃端勒热茶，热情招呼人的小姑娘，一开始索性爽勒堂搭伊讲明白：我勒等人，所以，也就勒此地立脱一歇。

不过，小姑娘还是热心热肚肠：呒末关系，天冷呀，侬可以到阿拉店里矮凳哴向坐勒等人，喫口茶。

结果，就坐进去，喫了一杯普洱陈皮茶，又喫了一杯玫瑰养颜茶。后来，又到贴隔壁一家店看勒两眼，两爿店面，是一家人家。

迭恁讲起来，伊拉生意做得蛮烊。

然后，我等的人到了。匆匆忙忙离开辰光，看小姑娘还立了风里，手里端的茶隐隐交有热气飘出来。

下趟要正式去一埭，专门喫茶。